Pavarësisht reshjeve të dëborës në zonat malore të veriut, aksi rrugor Bogë–Theth vazhdon të jetë i kalueshëm, duke u mundësuar vizitorëve qasje në një nga destinacionet më të njohura turistike të vendit.
Kryeministri Edi Rama ka publikuar pamje nga kjo rrugë panoramike, e cila shtrihet në një gjatësi prej 16 kilometrash dhe lidh Thethin me Qafën e Thores, Bogën dhe qytetin e Shkodrës.
Boga është kthyer në një nga pikat më të preferuara të turizmit malor, duke tërhequr si turistë vendas ashtu edhe të huaj. Zona shërben si një portë hyrëse drejt Alpeve Shqiptare, të njohura për shtigjet e tyre natyrore dhe peizazhet që ofrojnë përvoja unike për vizitorët.
Në këtë zonë zhvillohen edhe aktivitete sportive si alpinizmi, falë relievit të larmishëm që ofron mundësi ngjitjeje për nivele të ndryshme, nga fillestarët deri te alpinistët profesionistë.
Edhe Thethi, pjesë e Alpeve Shqiptare, është shndërruar vitet e fundit në një destinacion të rëndësishëm për turizmin e aventurës dhe natyrës, duke tërhequr gjithnjë e më shumë vizitorë që kërkojnë përvoja autentike në zemër të maleve.
Ndër atraksionet kryesore që vizitohen në Theth janë monumentet natyrore si Syri i Kaltër, vaskat e Ndërlysës, ujëvara dhe kanioni i Grunasit, shtegu Theth–Valbonë, shpella e Arapit, shtegu i Bjeshkëve të Namuna, si dhe destinacione të tjera të njohura.
Pasuritë natyrore të kësaj zone ndërthuren me trashëgiminë kulturore dhe historike të banorëve vendas, duke krijuar themele të forta për zhvillimin e qëndrueshëm të turizmit në këtë pjesë të Shqipërisë.
