Një zhvillim i ri në mjekësi po ndryshon mënyrën e trajtimit të tumoreve, duke u ofruar pacientëve alternativa shumë më të lehta se operacionet tradicionale. Për herë të parë, mjekët po përdorin MRI-në për të ftohur dhe shkatërruar tumoret me saktësi milimetrike, duke shmangur ndërhyrjet e rënda kirurgjikale dhe rikuperimet e gjata.
Spitali i Liverpoolit në Sydney ka vënë në funksion një teknologji inovative që mundëson trajtimin e tumoreve pa bisturi, përmes imazherisë së avancuar dhe ngrirjes së indeve. Metoda e përdorur quhet cryoablation (krioablacion) dhe funksionon duke shkatërruar qelizat tumorale me temperatura ekstremisht të ulëta.
Gjatë procedurës, një gjilpërë shumë e hollë (cryo-probe) futet drejtpërdrejt në tumor dhe, përmes gazit argon, krijon një “top akulli” që ngrin dhe shkatërron indin e sëmurë. Ajo që e bën këtë teknologji veçanërisht të avancuar është përdorimi i MRI-së në kohë reale, që u lejon mjekëve të monitorojnë përhapjen e ngrirjes dhe të mbrojnë indet e shëndetshme përreth. “Ne mund ta shohim saktësisht se ku po formohet akulli dhe ta kontrollojmë trajtimin me precizitet ekstrem”, thekson stafi mjekësor i Liverpool Hospital.
Sipas institucioneve mjekësore ndërkombëtare, krioablacioni është një metodë e pranuar e trajtimit lokal, veçanërisht për pacientët që nuk janë kandidatë të përshtatshëm për kirurgji të hapur ose për tumore të lokalizuara. Procedura konsiderohet minimalisht invazive dhe shoqërohet me kohë shumë më të shkurtër rikuperimi krahasuar me operacionet klasike.
Në Liverpool Hospital, kjo teknologji është përdorur tashmë edhe për tumore të shtyllës kurrizore dhe indeve të buta, me rezultate pozitive, ku pacientët kanë pasur lehtësim të shpejtë të dhimbjeve dhe janë kthyer në shtëpi brenda një kohe të shkurtër.
Ekspertët theksojnë se përparësitë kryesore të kësaj metode janë mungesa e prerjeve të mëdha kirurgjikale, rreziku më i ulët për komplikime, ruajtja e indeve të shëndetshme dhe rikuperimi shumë më i shpejtë i pacientëve. Hapja e kësaj njësie moderne është pjesë e një projekti të gjerë për zhvillimin e radiologjisë ndërhyrëse të avancuar, ku teknologjitë MRI, CT dhe angiografia integrohen për të rritur sigurinë dhe saktësinë e trajtimeve.
