Një stuhi e madhe dimërore pritet të përfshijë pjesën më të madhe të Shteteve të Bashkuara, duke ndikuar drejtpërdrejt jetën e mbi 200 milionë qytetarëve. Sipas parashikimeve meteorologjike, reshjet e dendura të borës, shiu ngrirës dhe temperaturat ekstreme do të krijojnë kushte tejet të rrezikshme në shumë rajone të vendit.
Shërbimi Kombëtar i Motit ka paralajmëruar se stuhia do të lëvizë nga perëndimi drejt lindjes, duke rritur rrezikun për hipotermi dhe ngrirje të lëkurës. Qytete të mëdha si Memphis, Nashville, Uashington DC, Filadelfia, Baltimore dhe Nju Jorku pritet të mbulohen nga bora, ndërsa në disa zona parashikohen mbi 30 centimetra reshje. Në Rrafshinat Veriore, temperaturat e ndjera nga era mund të zbresin nën -46 gradë Celsius.
Përballë situatës, 16 shtete kanë shpallur gjendje emergjence. Autoritetet kanë paralajmëruar për vështirësi serioze në qarkullim, ndërsa mijëra fluturime janë anuluar për fundjavën. Shoferëve u është bërë thirrje të shmangin udhëtimet, pasi gjatë kulmit të stuhisë lëvizja mund të jetë pothuajse e pamundur.
Edhe pas kalimit të stuhisë, një masë ajri arktik që pritet të zbresë nga Kanadaja do të mbajë temperaturat shumë të ulëta në pjesën lindore të SHBA-së edhe gjatë javës së ardhshme.
Ndërkohë, kryeqyteti amerikan, Uashingtoni, ka shpallur gjendje emergjente për shkak të stuhisë së borës që pritet gjatë fundjavës. Kryetarja e qytetit, Muriel Bowser, tha se masa ka hyrë menjëherë në fuqi dhe se reshje të tilla nuk janë parë prej një kohe të gjatë. Ajo paralajmëroi për mundësi të ngricave në rrugë dhe u bëri thirrje qytetarëve të qëndrojnë në shtëpi dhe të sigurojnë ndriçim alternativ për raste emergjente.
Lidhur me këtë situatë, presidenti amerikan Donald Trump reagoi në rrjetet sociale duke kritikuar ekspertët e klimës.
“A mund të na shpjegojnë përkrahësit e mjedisit: ÇFARË NDODHI ME NGROHJEN GLOBALE”, shkroi ai në Truth Social.
Ngrohja globale nënkupton një rritje graduale të temperaturave mesatare në terma afatgjatë. Sipas ekspertëve, kjo dukuri po ndikon edhe në shtimin e shpeshtësisë dhe intensitetit të ngjarjeve ekstreme të motit, përfshirë stuhitë e fuqishme dhe reshjet e mëdha.
