Pas vitesh tensionesh dhe debatesh mbi sigurinë kombëtare, TikTok ka siguruar vazhdimësinë e funksionimit në Shtetet e Bashkuara. Kompania mëmë, ByteDance, ka konfirmuar finalizimin e një marrëveshjeje për krijimin e një ndërmarrjeje të përbashkët me pronësi amerikane, e cila do të menaxhojë operacionet dhe të dhënat e përdoruesve brenda territorit amerikan.
TikTok numëron mbi 200 milionë përdorues në SHBA, ndërsa marrëveshja konsiderohet një pikë kthese pas përplasjeve që nisën në gusht të vitit 2020, kur presidenti amerikan Donald Trump tentoi mbylljen e aplikacionit për shkak të shqetësimeve për sigurinë kombëtare.
Në prill të vitit 2024 ishte miratuar një ligj që kërkonte nga ByteDance shitjen e aseteve në SHBA deri në janarin pasues, përndryshe aplikacioni do të mbyllej. Edhe pse kjo masë u mbështet nga Gjykata Supreme, Trump më vonë vendosi të mos e zbatojë ligjin, duke hapur rrugë për një zgjidhje alternative.
Sipas ByteDance, ndërmarrja e re me emrin TikTok USDS Joint Venture LLC do të ruajë të dhënat e përdoruesve amerikanë, aplikacionet dhe algoritmet përmes masave të shtuara të privatësisë së të dhënave dhe sigurisë kibernetike. Kompania nuk ka dhënë shumë detaje rreth procesit të shkëputjes së pronësisë.
Trump e përshëndeti marrëveshjen përmes një postimi në rrjetet sociale, duke deklaruar se TikTok-u “tani do të jetë në pronësi të një grupi patriotësh dhe investitorësh të mëdhenj amerikanë, më të mëdhenjtë në botë”.
Ai gjithashtu falënderoi presidentin kinez Xi Jinping “për bashkëpunimin me ne dhe, në fund, për miratimin e marrëveshjes. Ai mund të kishte vepruar ndryshe, por nuk e bëri, dhe ai çmohet për vendimin e tij”.
Në bazë të marrëveshjes, investitorët amerikanë dhe ndërkombëtarë do të zotërojnë 80.1 për qind të ndërmarrjes, ndërsa ByteDance do të mbajë 19.9 për qind të aksioneve. Tre investitorët menaxhues të TikTok USDS JV – Oracle, Silver Lake dhe firma investuese MGX me seli në Abu Dhabi – do të kenë secili nga 15 për qind të pronësisë.
Një zyrtar i Shtëpisë së Bardhë ka konfirmuar se marrëveshja është miratuar si nga qeveria amerikane, ashtu edhe nga ajo kineze.
Trump, i cili ka mbi 16 milionë ndjekës në llogarinë e tij personale në TikTok, ka deklaruar se aplikacioni e ka ndihmuar në fitoren e zgjedhjeve presidenciale. Shtëpia e Bardhë ka hapur gjithashtu një llogari zyrtare në TikTok në muajin gusht.
TikTok bëri të ditur se lista e investitorëve përfshin Dell Family Office – firmën investuese të themeluesit të Dell Technologies, Michael Dell – si dhe Vastmere Strategic Investments, Alpha Wave Partners, Revolution, Merritt Way, Via Nova, Virgo LI dhe NJJ Capital.
Në kuadër të strukturës së re drejtuese, Adam Presser dhe Will Farrell, ish-drejtues të TikTok USDS, janë emëruar drejtor ekzekutiv dhe drejtor i sigurisë. Ndërkohë, drejtori ekzekutiv i TikTok-ut, Shou Chew, është emëruar anëtar i bordit të ndërmarrjes dhe do të vazhdojë të udhëheqë biznesin dhe strategjinë globale të kompanisë.
