Kompania OpenAI ka ndërmarrë një hap të ri në drejtim të kontrollit të qasjes në platformat e saj, duke u përafruar me praktikat që tashmë po zbatohen nga kompani të tjera të teknologjisë globale.
Në kuadër të këtij ndryshimi, OpenAI ka filluar zbatimin global të një mjeti për parashikimin e moshës, i cili synon të identifikojë nëse një përdorues është i mitur. Ky sistem bazohet në analiza të ndryshme, përfshirë sjelljen e përdoruesit dhe të dhënat e llogarisë.
Sipas kompanisë, modeli vlerëson një kombinim treguesish të sjelljes dhe parametrave të llogarisë, përfshirë: sa kohë ka ekzistuar llogaria, kohët tipike kur përdoruesi është aktiv, modelet e përdorimit me kalimin e kohës dhe moshën e deklaruar nga vetë përdoruesi.
Në rastet kur ChatGPT e kategorizon gabimisht një përdorues si të mitur, personi i prekur do të duhet të dërgojë një selfie përmes platformës Persona, në mënyrë që të verifikohet mosha dhe të korrigjohet vlerësimi.
Kjo qasje vjen në një kohë kur shumica e kompanive të inteligjencës artificiale fillimisht prezantojnë funksione të reja dhe vetëm më pas, pas shfaqjes së problematikave, shtojnë masa shtesë sigurie dhe mbrojtjeje.
OpenAI është përballur më herët edhe me një padi të ndërlidhur me vdekjen e një adoleshenti, për të cilin ishte hedhur hipoteza se kishte përdorur ChatGPT për planifikimin e një veprimi vetëvrasës. Vetëm muajt e fundit, kompania ka nisur të shqyrtojë kufizime automatike të përmbajtjes për përdoruesit e mitur, si dhe krijimin e një këshilli këshillues për shëndetin mendor.
Në të njëjtën kohë, OpenAI po përgatitet të prezantojë edhe “modalitetin për të rritur” (adult mode), i cili do t’u mundësojë përdoruesve krijimin dhe përdorimin e përmbajtjeve më të hapura (NSFW).
Megjithatë, duke u bazuar në përvojat e platformave të tjera si Roblox, ekziston mundësia që përdoruesit e mitur të tentojnë të anashkalojnë mekanizmat aktualë të verifikimit, nëse synojnë të përdorin ChatGPT me qasje të rezervuar për të rriturit.
