Sistemi elektroenergjetik i vendit po përballet me sfida serioze në funksionimin e tij, për shkak të mospërputhjeve të theksuara mes planifikimit të energjisë dhe konsumit real gjatë ditës së sotme.
Operatori i Sistemit, Transmisionit dhe Tregut të Energjisë Elektrike ka bërë të ditur se këto devijime kanë krijuar vështirësi të mëdha në balancimin e rrjetit energjetik, duke rrezikuar stabilitetin e tij. Sipas njoftimit zyrtar, diferenca mes energjisë së nominuar dhe kërkesës aktuale ka arritur nivele shqetësuese.
“Sot, më 20.01.2025, KESCO ka nominuar rreth 26.17% më pak energji sesa kërkesa reale, duke e çuar Zonën e Kontrollit KOSTT në jo balanca mesatare prej rreth 211 MW orë, ndërsa në disa orë këto jo balanca tejkalojnë 260 MW orë”.
Në reagimin e tij, operatori vlerëson se një situatë e tillë është e papranueshme dhe përbën rrezik të drejtpërdrejtë për funksionimin e qëndrueshëm të sistemit elektroenergjetik.
“KOSTT bën thirrje që nominimet të reflektojnë saktë kërkesën reale dhe të korrigjohen menjëherë, për të shmangur devijimet dhe për të ruajtur sigurinë e sistemit.”
Për shkak të këtyre zhvillimeve, operatori ka bërë të ditur se është detyruar të kërkojë aplikimin e kufizimit të ngarkesës, si masë e fundit, me qëllim garantimin e operimit të sigurt të sistemit deri në stabilizimin e gjendjes.
