Ndryshimet klimatike po krijojnë sfida serioze për bujqësinë dhe blegtorinë, duke ndikuar në uljen e rendimentit, cilësisë së bimëve foragjere dhe prodhimit të qumështit, si dhe duke rritur rrezikun e sëmundjeve.
Këto problematika u diskutuan në konferencën “Biosiguria, ndryshimet klimatike dhe perspektiva e zhvillimit të sektorit të qumështit”, të organizuar nga Shoqata e Prodhuesve të Qumështit në bashkëpunim me AgroDev.
Profesori Nazmi Hasanaj tha se rritja e temperaturave shkakton stres termik te bimët, duke çrregulluar proceset metabolike dhe duke ulur prodhimtarinë. Sipas tij, në kushte ekstreme, disa kultura bujqësore mund të pësojnë edhe sterilitet të plotë.
Ndikimi i temperaturave të larta po reflektohet edhe në blegtori. Eksperti nga Shqipëria, Petrit Dobi, theksoi se nxehtësia e madhe ndikon negativisht në prodhimin e qumështit, riprodhimin dhe shëndetin e kafshëve. Ai rekomandon masa teknike në stalla, ajrosje më të mirë dhe përzgjedhje të racave më rezistente.
Dobi sugjeroi gjithashtu orientimin drejt kulturave foragjere më të qëndrueshme ndaj nxehtësisë, si jonxha, si dhe përdorimin e teknologjive digjitale dhe menaxhimin më efikas të ushqimit të kafshëve.
Profesori Kurtesh Sherifi paralajmëroi se ndryshimet klimatike po ndikojnë edhe në shtimin e sëmundjeve dhe shfaqjen e insekteve të reja, duke theksuar nevojën për rritjen e masave të biosigurisë dhe kontrollit në ferma.
Kryetari i Shoqatës së Prodhuesve të Qumështit, Naser Bajraktari, konfirmoi se ndryshimet klimatike tashmë kanë ndikuar negativisht në prodhimtari, duke bërë të ditur se janë duke u realizuar trajnime për fermerët.
Ndërkohë, ministri në detyrë i Bujqësisë, Imri Demelezi, tha se po ndërmerren masa mbështetëse, përfshirë subvencionimin e bimëve mjaltëdhënëse, përdorimin e farave cilësore dhe investime në pajisje për matjen e temperaturës dhe lagështisë në nivel vendi.
