Me rastin e shënimit të përvjetorit të Masakrës së Reçakut, Kuvendi i Komunës së Shtimes ka marrë një vendim simbolik dhe historik në nderim të rolit të Ambasadorit William Walker. Në një mbledhje përkujtimore të mbajtur sot, atij i është ndarë titulli ceremonial “Qytetar i Përjetshëm i Shtimes”.
Sipas njoftimit të Komunës, ky vlerësim i jepet Walkerit për kontributin e tij vendimtar në zbardhjen e së vërtetës rreth Masakrës së Reçakut më 15 janar 1999, si dhe për lidhjen e tij të vazhdueshme dhe të thellë me qytetin e Shtimes dhe banorët e tij.
Gjatë ceremonisë solemne, kryesuesi i Kuvendit Komunal, Rrahman Jakupi, theksoi se ky akt përfaqëson një mirënjohje institucionale dhe respekt të përhershëm për rolin e Ambasadorit Walker në faktorizimin e krimeve të kryera në Reçak dhe në informimin e opinionit ndërkombëtar.
“Ambasadori Walker është pjesë e historisë sonë dhe e së vërtetës sonë. Sot, Komuna e Shtimes ia hap përjetësisht dyert dhe zemrën si qytetar i këtyre njerëzve, si dëshmitar i së vërtetës dhe si mik i pandarë i Reçakut”, u shpreh Jakupi.
Titulli “Qytetar i Përjetshëm i Shtimes” përbën nderimin më të lartë ceremonial që jep Komuna dhe u dedikohet personaliteteve me ndikim të jashtëzakonshëm historik, moral dhe njerëzor për komunitetin.
