Instituti Kombëtar i Shëndetësisë Publike ka paralajmëruar qytetarët për një rritje të dukshme të rasteve me grip dhe infeksione respiratore dhe ka nxitur masat parandaluese për të mbrojtur shëndetin publik.
Përmes një njoftimi, IKSHPK thekson se vaksinimi mbetet mënyra më e efektshme për të parandaluar gripin sezonal dhe komplikimet e mundshme të tij. “Vaksinimi ndihmon në uljen e rrezikut të formave të rënda të sëmundjes, si dhe në mbrojtjen e grupeve më të rrezikuara, përfshirë të moshuarit, fëmijët, personat me sëmundje kronike, si dhe të gjithë personat nga mosha 6 muaj e lart që dëshirojnë të mbrohen nga gripi dhe komplikimet e tij”, thuhet në njoftim.
IKSHPK fton qytetarët që së bashku me familjarët të vizitojnë qendrat e mjekësisë familjare për të marrë vaksinën, duke theksuar se parandalimi mbetet hapi më i rëndësishëm për mbrojtjen e shëndetit publik.
