Jeta në një nga zonat më të ftohta të planetit kërkon përgatitje ekstreme dhe veshje të posaçme. Banorët duhet të mbështillen me disa shtresa rrobash përpara se të dalin jashtë, për shkak të temperaturave tepër të ulëta.
Yakutsku, qytet në Siberi të Rusisë, njihet si qyteti më i ftohtë në botë. Rreth 355 mijë njerëz jetojnë aty, ndërsa shumë prej tyre punojnë në minierat e diamanteve. Gjatë dimrit, temperaturat zbresin në nivele ekstreme dhe më 5 shkurt 1891 u regjistrua temperatura rekord prej -64.4°C. Në janar, qyteti ka më pak se katër orë dritë dielli në ditë.
Edhe këtë muaj, banorët u përballën me temperatura deri në -45°C, por jeta vazhdoi normalisht, megjithëse shkollat nuk u hapën. Për t’u mbrojtur nga të ftohtit, njerëzit vishen me rreth 10 kilogramë rroba. Ushqimi kryesor përbëhet nga mishi dhe peshku, pasi bimësia vështirë se i mbijeton klimës së ashpër.
YouTuber-ja Kiun B., e rritur në Yakutia, ndan në rrjete sociale përvojat e jetës në këtë qytet.
“Është absolutisht e domosdoshme të veshësh disa shtresa rrobash”, shpjegoi ajo, duke theksuar se “gjunjët janë veçanërisht të prirur ndaj ngrirjes në një të ftohtë kaq ekstrem”.
Motra e saj, Dayana, tregoi se për t’u mbajtur ngrohtë vesh disa shtresa rrobash dhe çizme tradicionale nga lëkura e drerëve.
“Gratë në Yakutia zakonisht kanë dy pamje”, thotë YouTuber-ja. “Njëra është më femërore me pallto leshi… Një tjetër është më e rastësishme me një xhaketë, e cila të mban shumë ngrohtë, dhe ato janë më të lira se një pallto leshi”.
Sipas saj, palltot me gëzof kushtojnë rreth 3,000 dollarë, ndërsa alternativat më të thjeshta rreth 500 dollarë. Në dimër, tregjet nuk kanë nevojë për frigoriferë, ndërsa makinat shpesh mbahen ndezur për të mos ngrirë.
Megjithatë, gjatë verës temperaturat rriten ndjeshëm dhe në korrik arrijnë mesatarisht deri në 26°C.
