Teatri Dodona do ta mbyllë vitin me një premierë teatrore, duke sjellë për publikun shfaqjen “Kukulla”, një ditë para ndërrimit të moteve. Kjo vepër vjen si pjesë e programit festiv të fundvitit dhe synon t’u ofrojë shikuesve një reflektim artistik në prag të Vitit të Ri.
Shfaqja “Kukulla”, me tekst të dramaturgut Miro Gavran, do të jepet premierë nga ora 19:30, duke shënuar një nga ngjarjet kulturore të fundvitit në kryeqytet.
Regjia mban firmën e Naser Shatrollit, i cili ka folur për këtë projekt artistik në emisionin “Ora 7”, duke e përshkruar shfaqjen si një vepër me ngarkesë të fortë simbolike dhe emocionale.
“Saktësisht një ditë para Vitit të Ri është premiera e shfaqjes ‘Kukulla’. ‘Kukulla’ flet për jetën e një personazhi që tenton të krijojë një relacion me një personazh që nuk ka raportim. Është një metaforë për momentet kur njeriu lodhet nga njeriu dhe tenton të gjejë diçka tjetër”, tha Shatrolli.
