Skuadra ukrainase Polissya Zhytomyr ka mbyllur me sukses edhe një tjetër transferim të rëndësishëm, duke siguruar shërbimet e mbrojtësit të Kolos dhe reprezentuesit të Kosovës, Ilir Krasniqi. Ky veprim vjen si pjesë e strategjisë së klubit për të përforcuar skuadrën para sezonit të ardhshëm.
Pas prezantimit të Lindon Emërllahut gjatë ditës, Polissya ka vazhduar aktivitetin intensiv në afatin kalimtar, duke shtuar edhe një emër tjetër të rëndësishëm nga futbolli kosovar. Sipas raportimeve nga mediat ukrainase, prezantimi zyrtar i Krasniqit pritet të ndodhë shumë shpejt, madje mund të realizohet gjatë natës së Vitit të Ri.
Detajet financiare të marrëveshjes nuk janë bërë publike, por më herët është raportuar se shuma e transferimit sillet rreth 2 milionë euro. Ndërkohë, Transfermarkt e vlerëson mbrojtësin kosovar me 1 milion euro.
Ilir Krasniqi iu bashkua Kolos gjatë verës së vitit 2024 dhe kishte kontratë të vlefshme deri në verën e vitit 2027. Në sezonin 2025/26, ai ka zhvilluar 14 paraqitje në elitën e futbollit ukrainas, duke realizuar edhe një gol.
Në arenën ndërkombëtare, Krasniqi numëron 17 paraqitje me Kombëtaren e Kosovës dhe vazhdon të jetë pjesë e rëndësishme e ekipit, i cili është në garë për kualifikim në fazën “play-off”.
