Microsoft është në proces të një përditësimi të rëndësishëm që synon të rrisë ndjeshëm shpejtësinë e punës së kompjuterëve me disqe SSD, veçanërisht atyre që përdorin teknologjinë moderne NVMe.
Deri më tani, një nga pengesat kryesore për performancën ishte mënyra se si sistemi Windows komunikonte me disqet NVMe. Në vend të një lidhjeje direkte, Windows përdorte protokollin më të vjetër SCSI, i cili ishte projektuar fillimisht për hard disqe tradicionale.
Kjo qasje kufizonte shfrytëzimin e plotë të kapaciteteve të SSD-ve moderne që funksionojnë mbi PCI Express, duke mos lejuar performancën maksimale që këto disqe mund të ofrojnë.
Me ndryshimet e reja, Microsoft po implementon mbështetje natyrore për NVMe pa përdorimin e SCSI. Ky përmirësim rrit ndjeshëm numrin e operacioneve të leximit dhe shkrimit në sekondë (IOPS), si dhe ul ngarkesën mbi procesorin. Sipas testimeve të brendshme, performanca e SSD-ve NVMe mund të kalojë nga rreth 1,8 milion në mbi 3 milionë IOPS.
Aktualisht, kjo teknologji është e disponueshme në Windows Server 2025 dhe mund të aktivizohet përmes cilësimeve specifike të sistemit. Microsoft bën të ditur se ky hap është pjesë e modernizimit të përgjithshëm të nënësistemit të ruajtjes së të dhënave.
Kompania ka konfirmuar gjithashtu se përmirësime të ngjashme pritet të implementohen edhe në Windows 11 në versionet e ardhshme të sistemit operativ.
Përfitimet më të mëdha do t’i ndjejnë përdoruesit e SSD-ve më të rinj PCIe 5.0, megjithatë rritje performance do të vërehen edhe në disqet PCIe 4.0 dhe 3.0, sidomos gjatë detyrave të rënda si përpunimi i skedarëve të mëdhenj, virtualizimi dhe video-lojërat.
