Njësitet Antikontrabandë të Doganës së Kosovës kanë ndërmarrë një operacion në Prishtinë, duke sekuestruar një sasi të konsiderueshme fishekësh në një lokal. Ky veprim bazohet në dyshimet për mbajtje të paligjshme të armëve dhe municionit.
Gjatë kontrollit në lokal dhe në një automjet të lidhur me rastin, Dogana ka gjetur dhe sekuestruar gjithsej 350 fishekë 9 mm për armë të shkurtër (pistoletë) dhe 30 fishekë kalibri 70 mm për armë gjuetie. Sipas autoriteteve, këto municione dyshohet se janë mbajtur në shkelje të legjislacionit në fuqi.
Për rastin është njoftuar Prokuroria kompetente, ndërsa dokumentacioni dhe materiali i sekuestruar i janë dorëzuar Policisë së Kosovës për trajtim dhe hetim të mëtejshëm, në përputhje me procedurat ligjore.
