Danimarka po përfundon një epokë më shumë se 400-vjeçare të dorëzimit tradicional të letrave, teksa Shërbimi Postar Danez do të dorëzojë letrën e tij të fundit më 30 dhjetor. Ky vendim shënon fundin e një tradite historike dhe një përqendrim në shërbimet e paketave për shkak të digjitalizimit në rritje.
PostNord, kompania që operon në Danimarkë dhe Suedi që nga 2009, njoftoi këtë ndryshim që do të çojë në heqjen e 1,500 kutive postare dhe shkurtimin e 1,500 vendeve pune. Kompania argumenton se kërkesa për letra ka rënë ndjeshëm, ndërsa dërgesat online po rriten vazhdimisht.
Ndërkohë, kutitë postare të vjetra po shiten si objekte koleksionimi; 1,000 prej tyre u shitën brenda tre orëve pas daljes në treg me çmime që fillonin nga 176 deri në 235 funte, ndërsa 200 të tjera pritet të shiten në ankand në janar.
Danezët do të mund të vazhdojnë të dërgojnë letra përmes kompanisë Dao, e cila do të zgjerojë shërbimet nga 30 milionë letra në vitin 2025 në 80 milionë letra vitin e ardhshëm. Megjithatë, letrat do të dërgohen kryesisht nga dyqanet Dao ose përmes shërbimeve të shtuara në shtëpi me pagesë shtesë.
Shërbimi postar danez ka qenë përgjegjës për dorëzimin e letrave që nga viti 1624, por përdorimi i letrave ka rënë me më shumë se 90% në 25 vitet e fundit. Megjithatë, të rinjtë e moshës 18–34 vjeç po shfaqin një interes të ri për shkrimin e letrave, duke e parë këtë si një kundërpeshë ndaj mbingopjes dixhitale.
Sipas ligjit danez, shërbimi për dërgimin e letrave duhet të ekzistojë, që do të thotë se nëse Dao ndalon shërbimin, qeveria do të detyrohet të caktojë një tjetër operator për ta siguruar këtë shërbim. /Gjurmuesi/
