Numri i rasteve me gripin H3N2 po rritet ndjeshëm këtë sezon, duke shkaktuar shqetësim për përhapjen e shpejtë dhe ngarkesën mbi sistemet shëndetësore. Ky variant i mutuar i gripit “të zakonshëm” po njihet si “super grip” për shkak të ngjitshmërisë së lartë dhe aftësisë për të shmangur imunitetin e fituar më parë.
Gripi H3N2 ka shkaktuar më parë valë të forta sëmundshmërie në vende si Australia, Japonia dhe Mbretëria e Bashkuar, ku spitalet janë përballur me rritje të numrit të pacientëve. Ekspertët paralajmërojnë se, për shkak të tubimeve gjatë festave, virusi mund të përhapet edhe më shpejt, duke rritur rrezikun për shtrime në spital dhe komplikime, veçanërisht tek fëmijët e shëndetshëm.
OBSH ka njoftuar se aktiviteti i gripit sezonal ka rritur globalisht, me dominim të viruseve A(H3N2). Ky variant është veçanërisht ngjitës për shkak të mutacioneve gjenetike që e bëjnë më të lehtë shmangien e imunitetit të mëparshëm. Profesorët dhe epidemiologët shpjegojnë se ndryshimet në proteinat H dhe N të virusit e bëjnë popullatën më të ndjeshme ndaj infeksionit, duke çuar në rritje të rasteve më herët se zakonisht.
Simptomat e H3N2 përfshijnë temperaturë të lartë, dhimbje koke dhe trupi, kollë të fortë, lodhje të madhe, dhimbje fyti, dhe më rrallë të vjella dhe diarre, sidomos te fëmijët. Infeksioni zakonisht zgjat 5-7 ditë, por kollë e fortë mund të zgjasë deri në tre javë.
Grupi më i rrezikuar për komplikime përfshin fëmijët nën pesë vjeç, personat mbi 65 vjeç, gratë shtatzëna dhe pacientët me sëmundje kronike. Vaksina kundër gripit sezonal vazhdon të ofrojë mbrojtje nga format e rënda të sëmundjes dhe shtrimi në spital, edhe pse efektiviteti ndaj infeksionit mund të ndryshojë këtë sezon. Ekspertët rekomandojnë fuqimisht vaksinimin, sidomos për grupet me rrezik të lartë dhe kujdestarët e tyre. /Gjurmuesi/
