Rritja e ndjeshme e konsumit të energjisë elektrike në prag të dimrit ka rikthyer shqetësimet për stabilitetin e furnizimit në vend. Autoritetet paralajmërojnë se mbingarkesa e sistemit mund të çojë në reduktime, ndërsa ekspertët e lidhin situatën me mungesën e investimeve ndër vite.
Operatori i Sistemit, Transmisionit dhe Tregut – KOSTT ka bërë të ditur se më 17 dhjetor është shënuar piku i konsumit prej 1468 megavatë/orë. Sipas këtij institucioni, kjo rritje e madhe e kërkesës për energji ka hapur mundësinë e reduktimeve në furnizim.
KOSTT njoftoi se konsumi i rrymës ka shënuar rritje prej 14.33 për qind dhe u ka bërë thirrje qytetarëve që të “kursejnë dhe zhvendosin konsumin” jashtë intervaleve më të ngarkuara, konkretisht nga ora 16:00 deri në 20:00 dhe nga 22:00 deri në 23:00.
Situata aktuale, sipas njohësve të fushës, është rezultat i mungesës së investimeve si në rrjetin energjetik, ashtu edhe në kapacitetet prodhuese. Ish-ministri i Tregtisë dhe Industrisë, Ismet Mulaj, tha se kjo gjendje lidhet drejtpërdrejt me mos-përmbushjen e obligimeve nga operatorët e licencuar në sektorin e energjisë.
“Kjo ka ardhur si pasojë e investimeve jo të bollshme në rrjetin e shpërndarjes së energjisë elektrike, si atë në domenin e KOSTT-it ashtu dhe atë të KEDS-it”, ka thënë Ismet Mulaj, Ish-ministër i Tregtisë dhe Industrisë.
Ai shtoi se mungesa e investimeve në kapacitete të reja prodhuese po i rëndon drejtpërdrejt qytetarët, të cilët po përballen me mungesë të energjisë, cilësi të dobët dhe fatura të larta.
“Ndoshta për mungesë të kapacitetit, ndoshta për jo-profesionalizëm, ose në raste të caktuara edhe për favorizim të operatorëve në treg, realisht kanë krijuar një lloj problematike të jashtëzakonshme, që qytetarët, konsumatorët në Kosovë sot, edhe nuk kanë energji të bollshme, edhe cilësia e energjisë nuk është e ajo që kërkohet, por edhe fatura ju vjen shumë e lartë”, ka thënë – Ismet Mulaj, Ish-ministër i Tregtisë dhe Industrisë.
Ndërkohë, përveç njoftimeve për ndërprerje të energjisë për shkak të punimeve në rrjet në 12 zona të rajoneve Prishtinë, Prizren, Gjakovë dhe Ferizaj, KEDS-i nuk ka dhënë përgjigje ndaj pyetjeve lidhur me furnizimin. Po ashtu, as KESCO nuk ka ofruar sqarime për situatën aktuale. /Gjurmuesi/
