Një zbulim me rëndësi të veçantë është bërë në komunën e Rahovecit, duke rihapur shpresat për zbardhjen e fatit të personave të zhdukur nga lufta e fundit në Kosovë.
Gjatë gërmimeve në zonën e njohur si “Përzhina”, janë gjetur dy pjesë eshtërore dhe mbetje mortore që dyshohet se i përkasin të paktën një individi, për të cilin ekziston mundësia të jetë viktimë e luftës dhe pjesë e listës së personave të zhdukur.
Ditor Haliti nga Instituti i Mjekësisë Ligjore bëri të ditur se mbetjet e gjetura janë dërguar në IML për verifikim dhe analiza të mëtejshme.
Sipas tij, mbetjet lidhen me ngjarjet e vitit 1998 në komunën e Rahovecit. Haliti shtoi se në këtë lokacion ekziston mundësia që të gjenden mbetje mortore të deri në tetë viktimave, ndonëse numri i saktë nuk mund të përcaktohet në këtë fazë.
Ai theksoi se kjo zonë ka qenë e trajtuar edhe më herët nga Tribunali i Hagës dhe ekipet e UNMIK-ut, por se jo të gjitha varrezat janë identifikuar atëherë.
“Ky është një lokacion që është punuar në të kaluarën nga Tribunali i Hagës nga ekipet e UNMIK-ut, por duke iu falënderuar punës analitike të Kryqit të Kuq Ndërkombëtar dhe institucioneve tona është ardh në përfundim që një numër i viktimave, personave të zhdukur, ka mundësi që janë ende të varrosur këtu sepse nuk janë zhvarrosur gjatë punimeve në të kaluarën. Ky numër është deri në tetë, nuk mund ta saktësojmë, mund të jetë edhe më i vogël por maksimum mund të jetë tetë”, ka thënë ai. /Gjurmuesi/
