Një ngjarje e rëndë është shënuar të martën në Junik, ku në një banesë janë gjetur pa vetëdije dy gra të moshuara.
Sipas njoftimit zyrtar të Policisë së Kosovës, në momentin e ndërhyrjes së ekipit mjekësor, njëra nga gratë kishte ndërruar jetë në vendngjarje, ndërsa tjetra është dërguar me urgjencë në Qendrën Klinike Universitare të Kosovës, në gjendje të rëndë shëndetësore.
Policia ka bërë të ditur se, me vendim të prokurorit kompetent, trupi i pajetë i viktimës është dërguar në Institutin e Mjekësisë Ligjore për obduksion, ndërkohë që rasti është duke u hetuar për të sqaruar rrethanat e plota.
Raporti i plotë i Policisë:
Hetim i vdekjes
Junik / 17.12.2025 – 15:30. Raportohet se në një shtëpi janë gjetur pa vetëdije dy femra të moshuara, kosovare. Lidhur me rastin ekipi mjekësor ka dalë në vendin e ngjarjes dhe ka konstatuar se njëra nga viktimat është pa shenja jete, ndërsa tjetra është dërguar për trajtim mjekësor në QKUK në gjendje të rëndë. Në vendin e ngjarjes, përveç njësive policore, ka dalë edhe prokurori, me vendimin e të cilit trupi i pajetë është dërguar në IML për obduksion.
