Shkencëtarët kanë vërtetuar se përdorimi i solariumeve shkakton dëmtime serioze të ADN-së në pothuajse gjithë sipërfaqen e lëkurës, duke e rritur ndjeshëm rrezikun për zhvillimin e melanomës. Ky zbulim thekson rrezikun e nxirjes artificiale për shëndetin e lëkurës dhe fuqizon paralajmërimet për përdorimin e saj, veçanërisht tek të rinjtë.
Studimi, i realizuar nga Northwestern Medicine dhe Universiteti i Kalifornisë në San Francisko, analizoi të dhënat e 32,315 pacientëve të dermatologjisë, nga të cilët 7,474 kishin përdorur solarium. Rezultatet treguan se melanoma u diagnostikua tek 5.1% e përdoruesve të solariumit, krahasuar me 2.1% tek ata që nuk e kishin përdorur. Edhe pas marrjes parasysh të faktorëve si mosha, gjinia dhe historia familjare, përdorimi i solariumit lidhej me një rritje prej 2.85 herë të rrezikut për melanomë.
“Në ekspozimin ndaj diellit natyror, rreth 20% e lëkurës pëson dëmtimin më të madh. Te përdoruesit e solariumit, pamë të njëjtat mutacione të rrezikshme pothuajse në të gjithë sipërfaqen e lëkurës”, tha autori kryesor i studimit, doktori Pedram Gerami. Analizat e ADN-së treguan se qelizat e lëkurës te përdoruesit kishin pothuajse dyfishin e mutacioneve, shpesh të lidhura drejtpërdrejt me melanomën, edhe në zona të trupit që zakonisht nuk ekspozohen në diell.
“Edhe në lëkurë që duket normale, pa nishane, gjetëm ndryshime në ADN që rrisin predispozitën për melanomë. Kjo nuk ishte treguar kurrë më parë”, shtoi Gerami.
Organizata Botërore e Shëndetësisë klasifikon solariumet si kancerogjenë të grupit 1, të njëjtin nivel si duhani dhe alkooli. Pavarësisht kufizimeve në disa vende si Australia dhe Brazili, përdorimi i tyre vazhdon të jetë i përhapur.
“Është e vështirë të justifikohet pretendimi se solariumet janë më të sigurta se dielli natyror. Ato rrisin mutacionet dhe rrezikun për melanomë, veçanërisht në pjesë të lëkurës që zakonisht marrin pak diell”, theksohet në raport.
Melanoma, forma më vdekjeprurëse e kancerit të lëkurës, shkakton rreth 11,000 vdekje çdo vit vetëm në Shtetet e Bashkuara të Amerikës. /Gjurmuesi/
