Autoriteti Kosovar i Konkurrencës ka reaguar lidhur me lëvizjet e çmimeve në treg gjatë periudhës së festave të fundvitit, duke u bërë thirrje bizneseve që të shmangin çdo rritje të pajustifikuar të çmimeve.
Ky institucion ka paralajmëruar se çdo shkelje e ligjit në këtë periudhë do të trajtohet me seriozitet dhe mund të pasohet me masa ndëshkuese, nëse konstatohet abuzim me tregun apo konkurrencën.
“Rikujtojmë se çdo marrëveshje, bashkërendim apo veprim i njëanshëm ndërmjet bizneseve që ka për qëllim ose efekt rritjen artificiale të çmimeve, ndarjen e tregut, kufizimin e konkurrencës apo abuzimin me pozitën e përbashkët dominuese, përbën shkelje të rëndë të Ligjit për Mbrojtjen e Konkurrencës dhe është subjekt i sanksioneve ligjore”, thuhet në reagimin e tyre.
Sipas AKK-së, çmimet në treg duhet të jenë rezultat i kushteve reale ekonomike dhe jo i marrëveshjeve të ndaluara, sjelljeve spekulative apo shfrytëzimit të pozitës së përbashkët dominuese nga operatorët ekonomikë.
Po ashtu, nga ky institucion është bërë e ditur se inspektorët kanë intensifikuar kontrollet në terren që nga fillimi i muajit dhjetor.
“Që nga fillimi i muajit Dhjetor dhe deri në fund të këtij muaji, të gjithë inspektorët e Autoritetit të Konkurrencës do të jenë çdo ditë në terren në çdo qytet të Republikës së Kosovës, duke monitoruar me kujdes dhe në mënyrë të vazhdueshme lëvizjet dhe rritjet e çmimeve në treg”, thuhet tutje.
Ndryshe, qytetarët në Kosovë vazhdimisht shprehen se në prag të festave të fundvitit çmimet rriten pothuajse çdo vit. /Gjurmuesi/
