Levante ka bërë të ditur se ndeshja e tyre e javës së 16-të në La Liga kundër Villarrealit është shtyrë pas një vendimi të Gjyqtarit të Vetëm të Garave Profesionale të Federatës Mbretërore të Futbollit Spanjoll (RFEF).
Takimi ishte planifikuar të zhvillohej të dielën, më 14 dhjetor, në orën 18:30 në stadiumin Ciudad de Valencia, por autoritetet kanë vendosur të shtyjnë ndeshjen për shkak të një alarmi të motit me nivel të kuq. Paralajmërimi përfshin reshje të rrëmbyeshme shiu përgjatë brigjeve veriore dhe jugore të provincës së Valencias, duke hyrë në fuqi nga ora 12:00 e ditës së sotme.
Data e re për zhvillimin e ndeshjes do të komunikohet më vonë nga klubi. /Gjurmuesi/
