Ambasada e Shteteve të Bashkuara në Kosovë ka njoftuar se të premten, nga ora 15:00 deri në 21:00, do të zhvillohet një ushtrim i përbashkët me Policinë e Kosovës.
Ky aktivitet do të përqendrohet në menaxhimin e krizave, koordinimin mes agjencive dhe procedurat e reagimit ndaj emergjencave. Ushtrimi është pjesë e përpjekjeve të vazhdueshme për të forcuar bashkëpunimin në fushën e sigurisë dhe për të rritur gatishmërinë ndaj një sërë incidentesh të mundshme.
Ambasada njofton se gjatë ushtrimit qytetarët mund të vërejnë prani të shtuar të Policisë së Kosovës dhe të personelit të sigurisë së Ambasadës amerikane, ndërprerje të trafikut dhe mbyllje të rrugëve sipas udhëzimeve të policisë. Përdorimi i sirenave, altoparlantëve dhe efekteve të tjera stërvitore mund të jetë i dukshëm për banorët dhe kalimtarët.
Autoritetet theksojnë se ky është vetëm një ushtrim, jo një incident real, dhe bëjnë thirrje për mirëkuptim dhe respektim të udhëzimeve gjatë zhvillimit të tij. /Gjurmuesi/
