Një grup prej 22 organizatash të shoqërisë civile ka dalë publikisht kundër sulmeve verbale të bëra ndaj gjyqtarëve nga përfaqësues të Lëvizjes Vetëvendosje, duke paralajmëruar se një diskurs i tillë cenon drejtësinë dhe krijon presion të panevojshëm mbi institucionet e pavarura.
Reagimi i tyre vjen pas një postimi të Alban Krasniqit, anëtar i KQZ-së nga Vetëvendosje, i cili në Facebook kishte përdorur gjuhë fyese ndaj gjykatave dhe Panelit Zgjedhor për Ankesa dhe Parashtresa (PZAP), pasi Gjykata Supreme refuzoi ankesën e Vetëvendosjes në lidhje me votimin jashtë vendit. PZAP kishte vendosur që qendrat e votimit në diasporë të kufizoheshin vetëm në përfaqësitë diplomatike, duke pranuar ankesën e LDK-së ndaj vendimit të KQZ-së.
Në reagimin e tyre të përbashkët, organizatat thanë se “Krasniqi ka publikuar një status në llogarinë e tij në Facebook, në të cilin fyen dhe denigron gjyqtarët e gjykatave dhe Panelit Zgjedhor për Ankesa dhe Parashtresa (PZAP) me fjalë poshtëruese. Kjo sjellje ka për qëllim të dëmtojë kredibilitetin e sistemit gjyqësor, të nxisë publikun të përdorë diskurs negativ ndaj gjyqtarëve dhe të krijojë klimë armiqësore ndaj tyre”.
Ato kërkuan nga kreu i Lëvizjes Vetëvendosje, Albin Kurti, që të ndalojë menjëherë sulmet ndaj gjyqësorit dhe institucioneve të tjera.
“Ne kërkojmë nga kryetari i Lëvizjes Vetëvendosje Albin Kurti që menjëherë të ndalojë sulmet ndaj sistemit gjyqësor dhe pushteteve tjera, siç janë mediat dhe organizatat e shoqërisë civile, sa herë që nuk pajtohet me to”, thuhet në deklaratë.
Organizatat kujtuan edhe detyrimin ligjor e etik për të respektuar vendimet e gjykatave, duke theksuar se çdo kundërshtim duhet bërë vetëm përmes procedurave të rregullta.
“Ne u rikujtojmë anëtarëve të Lëvizjes Vetëvendosje, e sidomos atyre që njëkohësisht ushtrojnë funksione publike, se e vetmja formë e kundërshtimit të vendimeve gjyqësore është përmes apelimit të tyre. Një gjë e tillë është e paraparë edhe me Rekomandimin CM/Rec (2010)12 të Këshillit të Europës për gjyqtarët… Ata duhet të shmangin gjithashtu veprimet që mund të vënë në pikëpyetje vullnetin e tyre për të zbatuar vendimet e gjyqtarëve, përveç rasteve kur shprehin qëllimin e tyre për të apeluar vendimin”, theksohet në reagim.
Në fund, organizatat theksuan se “sistemi gjyqësor është një shtyllë e fuqishme që mbron demokracinë në vend”. /Gjurmuesi/
