Kryetari i Aleancës Kosovare të Bizneseve (AKB), Agim Shahini, zhvilloi sot një takim me një delegacion të bizneseve turke, të udhëhequr nga Osman Servi, kryetar i UTSIAD-it në Stamboll, organizatë që përfaqëson industrinë dhe biznesin turko-ndërkombëtar. Ky takim u fokusua në zgjerimin e mundësive të bashkëpunimit ekonomik ndërmjet Kosovës dhe Turqisë.
Sipas njoftimit të zyrës për informim të AKB-së, gjatë takimit u diskutua mbi rritjen e investimeve, shkëmbimet tregtare dhe krijimin e partneriteteve të reja mes bizneseve të të dy vendeve.
“Z. Osman Servi theksoi se bizneset turke janë të interesuara për bashkëpunim më të ngushtë me AKB-në dhe për të eksploruar mundësitë që ofron tregu i Kosovës. Ai u shpreh se ekziston potencial i madh për projekte të përbashkëta në sektorë të ndryshëm ekonomikë.
Nga ana tjetër, Agim Shahini vlerësoi lartë gatishmërinë e UTSIAD-it për bashkëpunim dhe shprehu përkushtimin e AKB-së për të lehtësuar lidhjen e bizneseve dhe për të krijuar ura të reja partneriteti ndërmjet dy vendeve”, thuhet pos tjerash në këtë njoftim.
Takimi përfundoi me zotimin për të vazhduar komunikimin dhe përgatitjen e hapave konkretë drejt realizimit të bashkëpunimeve të ardhshme. /Gjurmuesi/
