Sonte pritet një mbrëmje elektrizuese në futbollin evropian, me disa nga ndeshjet më vendimtare të sezonit të Champions League.
Në xhiron e gjashtë, shumë skuadra kryesore luajnë jo vetëm për kualifikim, por për disa prej tyre edhe për mbijetesë në garë. Për tifozët, çdo gol dhe çdo fitore ka peshë të madhe.
Ndeshja më e pritur zhvillohet në “Giuseppe Meazza”, ku Interi luan si nikoqir i Liverpoolit. Një tjetër duel dramatik zhvillohet në “Camp Nou”, ku Barcelona pret Eintracht Frankfurtin, ndërsa Atletico Madrid luan në transfertë te PSV Eindhoven. Për këto skuadra, rezultati mund të ndikojë drejtpërdrejt në fatin e tyre në garën evropiane.
Përveç tyre, spektakël pritet edhe në duelet Bayern Munich-Sporting Lisbona dhe Atalanta-Chelsea, ku fitoret mund të vendosin shumë për renditjet në grup.
Skuadrat më të vogla gjithashtu kërkojnë surprizën e madhe: Kairat Almaty pret Olympiacosin, ndërsa Union Saint-Gilloise ndeshet me Marseille, duke shpresuar të sigurojnë pozita historike.
Në ndeshjet e tjera të mbrëmjes, Monaco do të jetë nikoqir i Galatasarayt, ndërsa Tottenham pritet të përballet me Slavia Pragën. /Gjurmuesi/
