Apple po përgatitet të sjellë përmirësime të rëndësishme në linjën e iPhone-ve për vitin e ardhshëm, duke përfshirë një ndryshim të madh në teknologjinë Face ID.
Sipas një rrjedhjeje të fundit në Weibo, linja iPhone 18 pritet të ketë Face ID nën ekran, duke përdorur “panele qelqi mikro-transparente” për të mundësuar këtë veçori. Burimi Smart Pikachu konfirmoi këtë thashethem, i cili ishte përfolur më parë në industrinë e teknologjisë.
Raporti nuk specifikon modelet që do ta marrin këtë teknologji, duke iu referuar thjesht “serisë iPhone 18”. Sipas informacioneve paraprake, iPhone 18 Pro, Pro Max dhe modeli i palosshëm pritet të jenë të pajisur me Face ID nën ekran. Ende nuk dihet nëse iPhone 18 bazë apo iPhone Air 2 do të përfitojnë nga ky përmirësim.
Ky zhvillim gjithashtu mundëson që Apple të zvogëlojë Dynamic Island, një ndryshim i rëndësishëm në dizajn. Linja kryesore e vitit të ardhshëm pritet të nisë fillimisht me tre modele, ndërsa iPhone 18 bazë dhe iPhone Air 2 pritet të dalin disa muaj më vonë, në fillim të vitit 2027.
Ky ndryshim në orar i jep Apple më shumë kohë për të vendosur mbi materialet që do të përdoren në modelet e fillimit të vitit të ardhshëm dhe, nëse ka kufizime furnizimi për panelet e reja, kjo mund të ndihmojë që teknologjia Face ID nën ekran të përhapet gradualisht në të gjithë linjën. /Gjurmuesi/
