Raporti më i fundit i Institutit të Kosovës për Drejtësi (IKD) hedh dritë mbi performancën e sistemit të drejtësisë në trajtimin e rasteve të korrupsionit, duke treguar se ndjekja e zyrtarëve të profilit të lartë mbetet ende e kufizuar. Të dhënat për vitin 2024 dhe nëntëmujorin e parë të vitit 2025 tregojnë se shumica e rasteve të korrupsionit lidhen me persona të niveleve të ulëta dhe të mesme, ndërsa të akuzuarit e profilit të lartë janë të pakët.
Sipas raportit të publikuar nga IKD, nga 444 persona të akuzuar për korrupsion në periudhën 2024-2025, vetëm 11 janë zyrtarë të profilit të lartë, duke përbërë vetëm 2.47% të totalit. Gzim Shala, hulumtues i lartë në IKD, theksoi se vetëm 3 prej 11 të akuzuarve janë akuzuar gjatë kohës që kanë mbajtur detyrën zyrtare, ndërsa pjesa tjetër janë akuzuar pas largimit nga detyra. Ai shtoi se gjatë nëntëmujorit të parë të 2025, nga katër zyrtarë të akuzuar, vetëm njëri ishte ish-zyrtar, ndërsa tre të tjerët akuzohen për pozitat që ende mbajnë. Për vitin 2024, të gjithë 7 zyrtarët e nivelit të lartë ishin akuzuar si ish-zyrtarë.
Shala po ashtu theksoi se Prokurori i Shtetit ka shënuar regres në trajtimin e lëndëve, duke ngritur 293 aktakuza në vitin 2024 dhe 151 në nëntëmujorin e parë të 2025. Ai shtoi se ndjekja e korrupsionit të nivelit të lartë aktivizohet kryesisht pasi zyrtarët humbasin fuqinë politike, duke treguar hesitimin e sistemit të drejtësisë ndaj personave me ndikim të madh institucional ose politik.
Alfons Lentz nga Zyra e Bashkimit Evropian, gjatë tryezës së organizuar nga IKD, vuri në dukje se ndonëse ka progres në sistemin e drejtësisë, kjo nuk reflektohet te rastet e korrupsionit të nivelit të lartë. Ai nënvizoi rëndësinë e bashkëpunimit ndërinstitucional dhe pritjen për Strategjinë Kundër Korrupsionit që do ta forcojë këtë bashkëpunim.
“Tash gjërat po duket më mirë, por kur vije fjala te rastet e nivelit të lartë korruptiv, nuk po ndodh një gjë e tillë”, ka thënë ai. Lentz shtoi se akterët e sistemit duhet të komunikojnë më mirë mes vete, të dëgjojnë organizatat e shoqërisë civile dhe raportet tjera, si dhe të prioritizojnë rastet e korrupsionit, duke ruajtur integritetin dhe llogaridhënien brenda institucioneve.
Ndryshe, IKD organizon tryezën e diskutimit të martën në kuadër të “Javës Kundër Korrupsion 2025”, e cila mbahet nga Koalicioni i Organizatave të Shoqërisë Civile me moton “Bashkë kundër korrupsionit”. /Gjurmuesi/
