Bashkimi Evropian ka zyrtarizuar një vendim të ri me rëndësi për proceset e migracionit dhe azilit, duke përfshirë Kosovën dhe shtatë shtete të tjera në kategorinë e vendeve të sigurta të origjinës. Ky klasifikim ndryshon mënyrën se si trajtohen kërkesat për azil nga shtetasit e këtyre vendeve.
Në një njoftim të lëshuar nga Këshilli Evropian, theksohet:
“Sot Këshilli ka miratuar qëndrimin e tij mbi dy aktet ligjore të BE-së, të cilat do të forcojnë zbatimin praktik të koncepteve kryesore mbi vendet e sigurta në rregullat e azilit të BE-së. Këto ligje të reja për migracionin synojnë të vendosin procedura më të shpejta dhe më efektive të azilit për ata që nuk duhet të marrin mbrojtje brenda BE-së”.
Sipas këtij vendimi, Kosova renditet ndër vendet që konsiderohen të sigurta, duke nënkuptuar se kërkesat për azil nga qytetarët kosovarë do të mund të përpunohen në kohë më të shkurtër dhe përmes procedurave të thjeshtuara.
BE e ka bazuar këtë përfshirje në vlerësimin se Kosova siguron mbrojtje adekuate për qytetarët e saj dhe nuk përbën rrezik për persekutim apo shkelje të rënda të të drejtave themelore.
Ky hap pritet të ndikojë drejtpërdrejt në mënyrën se si trajtohen aplikimet për azil në vendet anëtare të Bashkimit Evropian. /Gjurmuesi/
