Pas largimit të Ramadan Ahmetit nga pozita e Drejtorit të Termocentralit B, ka ndodhur një ndryshim i ri në strukturën drejtuese të Korporatës Energjetike të Kosovës. Sipas burimeve brenda KEK, sot është emëruar Jonuz Saraqi si Ushtrues Detyre i Drejtorit të Termocentralit Kosova B.
U.D. i drejtorit ekzekutiv të KEK, Gramos Hashani, ka marrë vendimin për të caktuar Saraqin në këtë rol, duke e rikthyer në drejtim të lartë brenda institucionit.
Saraqi ka shërbyer më parë si drejtor i Termocentralit “Kosova A”. Në vitin 2024, ai ishte shkarkuar nga ish-drejtori i KEK, Bekir Gerguri, për shkak të performancës së dobët. Megjithatë, këtë vit Hashani e kishte emëruar drejtor teknik në TCB, dhe tani ka vendosur ta bëjë edhe Ushtrues Detyre të Drejtorit të Termocentralit Kosova B.
Ndërkohë, paraardhësi i Saraqit, Ramadan Ahmet, u shkarkua të premten e kaluar nga pozita. Ndërsa situata në sektorin energjetik të Kosovës mbetet e vështirë, Hashani po merr vendime të shpejta për emërime dhe shkarkime brenda KEK.
Së fundmi, vëllai i ish-deputetit Bylbyl Sokoli është emëruar Ushtrues Detyre i Drejtorit Operativ të Termocentraleve dhe Minierës. Ky emërim ka nxitur reagime, pasi Sokoli është kimist me profesion, çka e bën të pazakontë caktimin e tij në një pozitë kaq teknike dhe me përgjegjësi të lartë në operimin e termocentraleve dhe minierave. /Gjurmuesi/
