Tre shtetas shqiptarë janë lënduar rëndë pas një aksidenti të ndodhur gjatë përpjekjes së tyre për t’i shpëtuar kontrollit policor në qytetin Olsberg të Gjermanisë.
Ngjarja ka ndodhur në orët e para të mëngjesit, kur automjeti i shqiptarëve, duke u larguar nga patrulla policore, u përplas me një dyqan me fustane nusërie, duke shkaktuar dëme të mëdha dhe plagosje të rënda për të tre pasagjerët. Njëri nga ata, i ulur në sediljen e pasagjerit të përparmë, ndodhet në gjendje kritike me dëmtime në shtyllën kurrizore dhe shpatulla, ndërsa dy të tjerët janë gjithashtu në gjendje të rëndë.
Sipas policisë gjermane, një patrullë vuri re automjetin gjatë monitorimit të trafikut. Automjeti përshpejtoi sapo vuri re uniformat e policisë dhe, ndonëse oficerët e ndoqën, e humbën nga sytë për shkak të shpejtësisë së lartë. Aksidenti ndodhi rreth një kilometër e gjysmë nga vendi ku makina ishte parë për herë të parë nga patrulla.
Raportohet se makina ka dalë nga rruga gjatë një kthese të majtë, duke u përplasur me vitrinën e dyqanit dhe më pas me murin pas tij, për të përfunduar mbi çatinë e dyqanit. Zjarrfikësit nxorën dy nga burrat nga rrënojat, ndërsa i treti ishte shtrirë pranë automjetit. Incidenti la një sipërfaqe të madhe të mbushur me mbeturina dhe dëmtime të konsiderueshme për dyqanin dhe murin përreth.
Policia njoftoi se për një nga pasagjerët ekzistonte një urdhër arresti për krime kundër pronës, ndërsa dy të tjerët dyshohet se kishin konsumuar alkool. Duke qenë se nuk dihet me siguri cili drejtonte automjetin, janë marrë mostra gjaku nga të dy. Hetimet mbi arsyen e saktë të arratisjes vazhdojnë. /Gjurmuesi/
