Këto muajt e fundit, institucionet e sigurisë në Kosovë janë përballur me një sërë rastesh që kanë ngritur seriozisht shqetësimet për sigurinë kombëtare. Vetëm nga qershori i vitit 2024 e deri më sot, janë arrestuar shtatë persona të dyshuar se kanë kryer veprimtari spiunazhi në shërbim të inteligjencës serbe.
Më shumë se gjysma e të arrestuarve janë shtetas shqiptarë të Kosovës. Sipas dyshimeve, disa prej tyre kanë mbledhur dhe kanë dërguar informacione e dokumente te BIA serbe në lidhje me Ushtrinë Çlirimtare të Kosovës, drejtues e pjesëtarë të saj, si dhe struktura të ndryshme të sigurisë.
Këto veprime po vlerësohen si një goditje serioze ndaj sigurisë së vendit. Njohësi i çështjeve të sigurisë, Arben Dashevci, thekson se pasojat nga aktivitetet e tilla mund të jenë të rënda.
“Sjelljet e tyre kanë cenuar sigurinë e qytetarëve dhe stabilitetin kombëtar. Spiunazhi është një formë kriminale e rëndë, komplekse dhe e vështirë për t’u zbuluar, dhe për këtë duhen fakte të shumta”, ka deklaruar ai.
Edhe eksperti tjetër i sigurisë, Avni Islami, paralajmëron se numri i atyre që bashkëpunojnë me Serbinë është më i lartë sesa rasti i personave të kapur deri tani, duke lënë të kuptohet se mund të ketë arrestime të reja.
“Shtatë apo tetë persona tashmë janë arrestuar ose dënuar, por numri i informatorëve, bashkëpunëtorëve apo edhe agjentëve serbë është shumë më i madh”, ka thënë ai.
Shtetasit Muharrem Qerimi, Bedri Shabani, Aleksandër Vllajiq, Bojan Jevtiq, Hysri Selimi, Jelena Gjukanoviq dhe Fatmir Sheholli janë ndër personat e arrestuar dhe të dënuar për dyshimet e ngritura lidhur me veprën penale të spiunazhit. /Gjurmuesi/
