Operatori i Sistemit, Transmetimit dhe Tregut të energjisë elektrike ka reaguar ndaj disa deklarimeve të fundit, duke sqaruar se informacionet për furnizim me energji elektrike nga kompania EFT LLC më 28 nëntor 2025 nuk janë të vërteta.
Sipas njoftimit, të dhënat zyrtare të Operatorit të Tregut tregojnë se EFT LLC nuk ka rezervuar kapacitete ndërkufitare në SEE CAO për furnizimin e konsumatorëve të Kosovës, por vetëm për transit të energjisë elektrike.
Në sqarim thuhet se rezervimi i kapaciteteve ndërkufitare në SEE CAO përdoret për import dhe eksport të energjisë, ndërsa të hyrat nga këto kapacitete ndahen mes operatorëve të transmetimit sipas metodologjisë përkatëse. KOSTT rikujton se është themelues dhe aksionar në SEE CAO së bashku me shtatë operatorë të tjerë të rajonit: Kroacinë, Bosnjë dhe Hercegovinën, Malin e Zi, Shqipërinë, Greqinë, Turqinë dhe Maqedoninë e Veriut.
Më tej theksohet se SEE CAO menaxhon alokimin e kapaciteteve ndërkufitare në dhjetë kufij të zonave të ofertimit në Evropën Juglindore. Alokimi bëhet përmes ankandeve eksplicite të bazuara në NTC, në përputhje me rregulloren e BE-së 714/2009 dhe me Traktatin e Komunitetit të Energjisë.
KOSTT thekson se mbetet i angazhuar për informim korrekt dhe transparencë ndaj publikut. /Gjurmuesi/
