Në përvjetorin e ditëlindjes së komandantit legjendar të UÇK-së, Adem Jashari, dhe në Ditën e Pavarësisë së Shqipërisë, kompleksi memorial “Adem Jashari” në Prekaz u vizitua nga qytetarë nga të gjitha trojet shqiptare, të cilët erdhën për të nderuar veprën e familjes Jashari dhe daljen për herë të parë të UÇK-së.
Vizitorë nga Shqipëria, si Elidon Gramçi nga Tirana, thanë se është viti i pestë që vijnë për të nderuar dëshmorët e atdheut dhe familjen Jashari që dhanë jetën për lirinë e Kosovës. Ai theksoi se Kosova dhe Shqipëria janë një komb.
Edhe vizitorë të tjerë, si Fitim Beqiri nga Elbasani, u shprehën se ndihen krenarë për kontributin e familjes Jashari dhe shpresojnë që një ditë Shqipëria dhe Kosova të jenë një komb i vetëm.
Veterani i brigadës 111 “Tigrat e Zi”, Bekim Shyti, nënvizoi rëndësinë e kësaj date që bashkon shqiptarët nga Leposaviqi deri në Vlorë dhe theksoi se kujtimi i daljes së UÇK-së dhe ditëlindja e Adem Jasharit duhet të përcillet te gjeneratat e reja si data historike.
Ragim Emrushi nga komuna e Shtimës e përshkroi këtë ditë si më të gëzueshmen për kombin shqiptar dhe lavdëroi betimin e ushtarëve të UÇK-së.
Kjo datë e rëndësishme për shqiptarët përmbledh tre ngjarje kryesore: daljen e Ushtrisë Çlirimtare të Kosovës për herë të parë, ditëlindjen e komandantit legjendar Adem Jashari dhe 113-vjetorin e Pavarësisë së Shqipërisë. /Gjurmuesi/
