Edhe pse ChatGPT paraqitet si një asistent personal shumë i avancuar, ka një dobësi të dukshme: nuk mund të tregojë kohën e saktë lokale.
Kur përdoruesit e pyetën sa është ora, ChatGPT përgjigjet shpesh: “Nuk kam qasje në orën në kohë reale të pajisjes suaj ose në vendndodhjen tuaj, kështu që nuk mund të them kohën e saktë lokale për ju.” Ndonjëherë kërkon specifikimin e një qyteti ose zone kohore, vetëm për të treguar më pas se nuk ka mundësi ta kontrollojë kohën as kështu.
Ky problem është përmendur shpesh në forumet e Reddit dhe ChatGPT, ku një përdorues i ka sugjeruar OpenAI-t të adresojë këtë çështje, duke thënë se kjo i jep “një emër të keq” modelit të AI “me aftësi njohëse”.
Ndërkohë, çdo kompjuter apo telefon mund të tregojë kohën me lehtësi falë çipave të vegjël të integruar. Por sistemet gjeneruese të AI, si modelet e mëdha gjuhësore dhe vizuale që fuqizojnë ChatGPT, Gemini të Google dhe Claude të Anthropic, janë ndërtuar për një qëllim të ndryshëm.
Këto modele bazohen kryesisht në të dhënat e tyre të trajnimit për të parashikuar përgjigje ndaj pyetjeve, dhe nuk përfshijnë përditësime të vazhdueshme në kohë reale për gjëra si ora, përveç nëse kërkojnë informacion të tillë posaçërisht në internet. /Gjurmuesi/
