Një tjetër rast shqetësues dhune mes të miturve është raportuar të martën në Drenas dhe Gjilan, ku gjashtë vajza të reja janë shoqëruar nga policia. Ato dyshohet se janë përfshirë në një përleshje fizike, e cila sipas informacioneve përfshinte edhe përdorimin e mjeteve të mprehta. Ngjarja ka nxitur reagime dhe debat publik mbi rritjen e dhunës tek të rinjtë.
Psikologia Atifete Syla, e ftuar në emisionin “Ora Shtatë”, theksoi se rrënjët e këtyre rasteve duhen kërkuar te mjedisi ku rritet fëmija, e në veçanti te familja. Ajo tha se ekspozimi i të miturve ndaj dhunës, apo edhe përjetimi i saj në fëmijëri, është faktor që shpesh reflektohet në sjellje të dhunshme më vonë.
“Është shqetësuese. Është rritur numri i rasteve të dhunës tek të rinjtë, sidomos tek të miturit. Ka disa faktorë që ndikojnë. Faktori kryesor është gjithmonë familja, ekspozimi i fëmijës ndaj dhunës, ose ka qenë vet i abuzuar. Pastaj janë institucionet, shkollat, rrethi ku jeton. Mendoj që gjithë këto probleme që kemi si vend nuk i marrim mjaft seriozisht dhe shpesh mendojmë se nuk ndikojnë këta faktorë, por ndikojnë”, është shprehur Syla.
Gazetarja Agnesa Demaj, e cila komentoi rastin në të njëjtin emision, vuri në dukje një tjetër shqetësim: mungesën e reagimit institucional. Sipas saj, heshtja e krerëve shtetërorë dhe e institucioneve përgjegjëse lidhur me dhunën mes të miturve është alarmante dhe krijon përshtypjen e neglizhencës ndaj një problemi që po përshkallëzohet. /Gjurmuesi/
