Autoritetet italiane kanë zbuluar një rast të çuditshëm mashtrimi dhe krimi pas një dyshimi për identitet të rremë, që çoi në arrestimin e një burri 57-vjeçar në veri të Italisë.
Burri, djali i Graziella Dall’Oglio që kishte ndërruar jetë në vitin 2022 në moshën 82-vjeçare në Borgo Virgilio pranë Mantovës, nuk e kishte raportuar vdekjen e nënës së tij tek autoritetet. Për të vazhduar vlefshmërinë e kartës së identitetit të saj, ai vuri grim, paruke dhe rroba të ngjashme me ato të gruas, duke u paraqitur si ajo për të përditësuar dokumentin personal.
Dyshimi u ngrit nga një agjent që përpunonte aplikimin, i cili njoftoi autoritetet pasi pa veprim të dyshimtë. Pamjet nga kamerat e sigurisë treguan burrin duke shkuar me veturë të veshur si nëna e tij, edhe pse ajo nuk kishte patentë shoferi.
Kontrolli i mëtejshëm i policisë çoi në gjetjen e trupit të mumifikuar të gruas së moshuar në dollapin e lavanderisë, të mbështjellë me çanta. Burri tani përballet me akuza për fshehje të një kufome, mashtrim ndaj shtetit, imitim të identitetit dhe falsifikim të një dokumenti publik. Autoritetet po kryejnë autopsinë për të përcaktuar shkakun e vdekjes, ndërsa ai mbahet në burg.
Rasti ka nxjerrë në pah problematikën e mashtrimeve me pensionet shtetërore në Itali, ku disa individë imitojnë të vdekurit për të marrë përfitime, një fenomen që ndodh çdo vit dhe shpesh vonon për shkak të mospërputhjeve mes regjistrave të vdekjeve dhe shërbimeve publike. /Gjurmuesi/
