Lidhja Demokratike e Kosovës do të mbajë nesër mbledhjen e 7-të të Kryesisë së saj, e cila fillon nga ora 15:00. Ky takim vjen në një moment vendimtar, për t’i dhënë formë strategjive të partisë pas zgjedhjeve lokale dhe përgatitjeve për zgjedhjet e jashtëzakonshme parlamentare më 28 dhjetor.
Ftesa për mbledhjen, e nënshkruar nga kryetari i LDK-së, Lumir Abdixhiku, përfshin pesë pika kryesore diskutimi. Kryesia pritet të analizojë rezultatet e zgjedhjeve lokale, duke vlerësuar fushatën, identifikuar pikat e forta dhe të dobëta, si dhe performancën e degëve dhe kandidatëve në garë.
Një pikë qendrore e mbledhjes është procedura për nominimin e kandidatit zyrtar të LDK-së për postin e Kryeministrit. Qëndrimet dhe diskutimet e anëtarëve të Kryesisë do të jenë vendimtare për këtë vendim final.
Përveç nominimit, Kryesia do të hartojë edhe planin e fushatës, duke shqyrtuar organizimin në terren, mobilizimin e degëve dhe strategjinë mediatike. Po ashtu, do të trajtohen çështje logjistike dhe koordinimi me Shtabin Zgjedhor.
Në këtë mbledhje do të vendoset edhe data e mbajtjes së Këshillit të Përgjithshëm të LDK-së, ku do të paraqiten dokumentet zyrtare dhe do të miratohen materialet për zgjedhjet. Diskutime të tjera mund të përfshijnë çështje statutare, ndryshime në përbërjen e Kryesisë dhe vendime operative sipas nevojës. /Gjurmuesi/
