Shkencëtarët në ETH Zürich kanë prezantuar një avancim revolucionar në trajtimin e goditjeve në tru: mikrorobota të vegjël më pak se dy milimetra që mund të udhëtojnë brenda enëve të gjakut dhe të dërgojnë barnat pikërisht aty ku janë të nevojshme. Kjo teknologji, e publikuar në revistën prestigjioze Science, premton të rrisë ndjeshëm efikasitetin e trajtimeve dhe të reduktojë efektet anësore.
Edhe pse robotët nuk janë testuar ende te njerëzit, ata kanë treguar rezultate të shkëlqyera në eksperimente me kafshë të mëdha, përfshirë derrat dhe delet, duke hapur rrugën për aplikime klinike të mundshme në të ardhmen.
Mikroroboti ka formë sferike dhe përbëhet nga një gel biokompatibël që mban barnat kundër mpiksjes ose tumoreve. Ai përfshin nanopjesëza oksidi hekuri që e bëjnë të kontrollueshëm përmes fushave magnetike dhe elementë kontrasti për të mundësuar monitorim me rreze X.
Lëvizja e tij drejtohet nga jashtë trupit përmes magneteve të fuqishme, duke i lejuar robotit të lëvizë edhe kundër rrjedhës së gjakut. Kur arrin në vendin e bllokimit, një fushë magnetike me frekuencë të lartë nxeht kapsulën, shkrij gelin dhe çliron ilaçin direkt në mpiksjen e gjakut.
Kjo metodë inovative mundëson administrim shumë më të saktë të barnave, duke ulur rrezikun e gjakderdhjes, toksicitetit sistemik dhe dëmtimit të indeve të shëndetshme, dhe duke rritur efikasitetin në zonën e prekur. Për shkak se goditja në tru mbetet një nga shkaqet kryesore të vdekshmërisë dhe paaftësisë në botë, ky përparim ka një rëndësi të veçantë.
Sfidë e madhe ka qenë navigimi i robotëve në qarkullimin real të gjakut, që përballon rrjedha të fuqishme dhe presione të mëdha. Fabian Landers, autori kryesor i studimit, shpjegon se ekipi zhvilloi tre strategji për lëvizje: rrotullim pranë murit të enës, tërheqje magnetike drejt destinacionit dhe lëvizje kundër rrjedhës. Në testet laboratorike, robotët arritën shpejtësi deri në 4 mm/s.
Hapat e ardhshëm përfshijnë testime të zgjeruara te kafshët e mëdha, vlerësim të sigurisë së materialeve dhe fushave magnetike, si dhe përgatitje për provat klinike tek njerëzit. Përveç trajtimit të goditjeve në tru, teknologjia mund të përdoret edhe për tumoret, infeksionet lokale dhe bllokimet e tjera vaskulare.
Nëse arrihet miratimi për përdorim klinik, këto mikrorobota mund të transformojnë mënyrën e administrimit të barnave, duke hapur një epokë të re të mjekësisë precize. /Gjurmuesi/
