Pas shpalljes së zgjedhjeve të 28 dhjetorit, njohës të çështjeve politike parashohin lëvizje të reja në skenën politike dhe madje skenarë të papritur në raportet mes partive. Sipas tyre, rezultati mund të jetë ndryshe nga ai i shkurtit, ndërsa nuk përjashtohet as mundësia e një koalicioni mes LVV-së dhe PDK-së.
Analisti Afrim Kasolli vlerëson se pas zgjedhjeve ekziston potencial real që të dyja partitë të gjejnë terren të përbashkët për bashkëqeverisje, megjithëse një marrëveshje e tillë do të kërkonte justifikime të qarta para elektorateve të tyre.
“Nuk përjashtohen skenarët e një bashkëpunimi mes LVV-së dhe PDK-së, duke e paraqitur rezultatin zgjedhor si nevojë politike që detyron arritjen e marrëveshjes”, ka deklaruar ai.
Zyrtarë të PDK-së deri më tani kanë kundërshtuar publikisht koalicionin me Vetëvendosjen, ndërsa edhe LVV ka mbajtur një vijë të fortë ndaj PDK-së. Megjithatë, pas zgjedhjes së Bedri Hamzës kryetar të PDK-së, Albin Kurti e uroi dhe foli për një mundësi “bashkëpunimi të ndërsjellë”. Nga ana tjetër, Hamza ka theksuar disa herë se nuk sheh vija të kuqe ndaj ndonjë partie.
Edhe analisti Adrian Zeqiri pret që pas zgjedhjeve të shemben barrierat mes partive të mëdha. Ai parashikon ndryshime të vogla në rezultatet zgjedhore, të cilat megjithatë mund të sjellin pasoja të rëndësishme në konfigurimin politik.
“Shpresoj që pas zgjedhjeve të thyhen kufizimet e deritanishme dhe partitë të reflektojnë për bashkëpunime të reja. Edhe ndryshimet e vogla në demokracitë parlamentare mund të krijojnë situata të reja”, ka thënë Zeqiri.
Ai e sheh krizën institucionale që ka zgjatur mbi 10 muaj si faktor të rëndësishëm që mund të ndikojë në orientimin e votuesve. Sipas tij, ka rrezik për pjesëmarrje më të ulët, pasi qytetarët tashmë kanë krijuar bindje për përgjegjësit e bllokadës.
“Do të ketë të papritura edhe për faktin se pothuajse një vit vendi ka qenë në ngërç. Një pjesë e votuesve mund të refuzojnë të dalin fare, çka ndikon drejtpërdrejt në rezultat”, ka theksuar ai.
Ndërkohë, Kasolli thekson se LVV synon të ringjallë atmosferën e vitit 2021 dhe të rikthehet në kuotën 50 për qind të votave. Partitë e tjera, nga ana tjetër, shohin si objektiv kryesor uljen e LVV-së nën 40 deputetë.
“Sipas kalkulimeve, nëse LVV arrin 50 për qind, e formon qeverinë vetë. Nëse partitë tjera e ulin nën 40 deputetë, atëherë zhbllokohen edhe çështjet si zgjedhja e presidentit në mars”, ka thënë Kasolli.
Pas zgjedhjeve të 9 shkurtit, Vetëvendosja kishte tentuar dy herë të arrinte marrëveshje me LDK-në, por pa sukses, pasi LDK kishte refuzuar të hynte në qeveri pa fituesin e zgjedhjeve. /Gjurmuesi/
