Filmi “Luna Park” u prezantua në Prishtinë duke tërhequr vëmendje të veçantë, pasi vjen si kandidati i Shqipërisë për nominim në “Academy Awards”, në një vit kur Kosova nuk ka dorëzuar asnjë film në garën ndërkombëtare. Megjithatë, prania kosovare është e fortë: aktorja Adriana Matoshi mban rolin kryesor dhe një pjesë e ekipit është nga Kosova, duke i dhënë projektit një peshë që shkon përtej bashkëprodhimit teknik.
Matoshi luan Mirën, një nënë e vetme nga Elbasani, që lufton për të mbijetuar në Shqipërinë e vitit 1997, të zhytur në ethet e skemave piramidale dhe kaosit që pasoi kolapsin e tyre.
“Luna Park”, me regji të Florenc Papasit, është kandidatura zyrtare e Shqipërisë për edicionin e 98-të të Oscars, e përzgjedhur nga Komisioni Përzgjedhës dhe e prodhuar nga “On Film Production”, në bashkëpunim me Qendrën Kinematografike të Kosovës dhe “Buka Production” të Fatmir Spahiut.
Prania kosovare në film është thelbësore, jo vetëm për shkak të aktores kryesore, por edhe për ekipin krijues. Kjo e ka bërë premierën në Prishtinë të ndihet si një rikthim simbolik i Kosovës në garën ndërkombëtare, edhe pse pa film të vetin këtë vit.
Rrëfimi i filmit ndjek historinë e Mirës, që ndjek ëndrrën për një jetë më të mirë përmes investimeve në skemat piramidale. E bindur se mund t’i sigurojë një të ardhme djalit të saj, ajo rrezikon gjithçka – kursimet, sendet me vlerë, madje edhe shtëpinë. Ndërkohë, djali i saj Toni, luajtur nga Orion Jolldashi, përballët me pasigurinë e një vendi që po shembet.
Adriana Matoshi ka treguar se roli ka qenë emocionalisht i rëndë, sidomos për shkak të dialektit, temës dhe kushteve të xhirimit. Ajo pohon se rrëfimi i filmit është vetëm një nga miliona historitë që shqiptarët kanë përjetuar në vitin 1997.
Shkatërrimi i skemave piramidale çon në protesta, dhunë dhe arratisje masive. Mira dhe Toni ikin drejt Greqisë, ku ndahen në rrethana të vështira. Toni gjen strehë në një “Luna Park” të braktisur – një metaforë e ëndrrave të humbura dhe fëmijërisë së ndalur.
Fatmir Spahiu ka theksuar rëndësinë e pranisë kosovare në film dhe dimensionin që i jep fakti që roli kryesor i takon një aktoreje nga Kosova. Ai ka rikujtuar se projekti ka nisur para gjashtë vitesh dhe se temat e tij historike komunikojnë fuqishëm me publikun.
Premiera në Prishtinë ka nxjerrë në pah një realitet të dyfishtë: mungesën e një kandidature nga Kosova këtë vit, por edhe një prani të pakontestueshme brenda “Luna Park”, përmes aktorëve, producentëve dhe mbështetjes institucionale. /Gjurmuesi/
