Shumë faqe interneti të njohura, përfshirë “X” dhe “ChatGPT”, përjetuan ndërprerje të martën për shkak të një problemi në një nga kompanitë kryesore të infrastrukturës së internetit, “Cloudflare”.
Mijëra përdorues raportuan vështirësi për t’u lidhur me uebfaqet dhe disa shërbime të tjera, sipas faqes së monitorimit “Downdetector”, me raportime që nisën rreth orës 12:00.
“Cloudflare” njoftoi se ndërprerja ndodhi për shkak të një file konfigurimi, i krijuar për të menaxhuar trafikun e kërcënimeve, i cili nuk funksionoi si duhet, duke shkaktuar një bllokim në softuerin që menaxhon trafikun për shërbimet e saj më të gjera.
Kompania u kërkoi falje klientëve dhe përdoruesve të internetit, duke theksuar se çdo ndërprerje është e papranueshme për shkak të rëndësisë së shërbimeve të saj. Ndërkohë që problemi është zgjidhur, disa shërbime mund të vazhdojnë të kenë gabime të vogla gjatë rikthimit online.
Ndërprerja ndikoi në një gamë të gjerë aplikacionesh dhe faqe interneti, duke përfshirë edhe portalin KOHA.net.
“Cloudflare” është një nga ofruesit më të mëdhenj të shërbimeve të sigurisë në internet, duke përfshirë kontrollin e lidhjeve të vizitorëve që janë njerëz dhe jo robotë. Kompania raporton se rreth 20% e të gjitha faqeve të internetit në botë përdorin shërbimet e saj. /Gjurmuesi/
