Presidentja e Kosovës, Vjosa Osmani, ka theksuar në një intervistë të fundit se përparimi i vendit drejt Bashkimit Evropian mbetet i ngadalësuar dhe procesi “bazuar në merita” që shpesh përmendet nga Brukseli ende nuk është i dukshëm në praktikë.
Osmani vlerësoi përpjekjet e Kosovës për t’u integruar në BE, duke nënvizuar se populli mbështet fuqishëm rrugën evropiane dhe se vendi ka ndjekur politikën e përbashkët të jashtme dhe të sigurisë së Bashkimit Evropian, përkundër bllokadave dhe perceptimit se përpjekjet e tij merren si të mirëqena. Ajo gjithashtu theksoi rëndësinë e reformave në ekonomi, sundim të ligjit dhe luftën kundër krimit dhe korrupsionit, të cilat sipas saj janë elemente kyçe në rrugën e integrimit.
Duke folur për aplikimin e Kosovës për statusin e vendit kandidat, Osmani theksoi se ky proces nuk është shqyrtuar dhe se dokumentacioni ndodhet ende në “sirtarët” e Bashkimit Evropian, pavarësisht se janë kaluar tre vjet nga dorëzimi i aplikimit.
Presidentja gjithashtu nënvizoi se integrimi në NATO është prioritet më i madh për sigurinë e vendit dhe rajonit, duke e konsideruar anëtarësimin në këtë aleancë si një masë thelbësore për stabilitet dhe mbrojtje. /Gjurmuesi/
