Kombëtarja e Kosovës ka nisur sot udhëtimin drejt Lubjanës, ku të shtunën do të përballet me Slloveninë në një ndeshje kyçe për kualifikimet në Botërorin 2026. Përgatitjet për këtë sfidë janë zhvilluar me intensitet maksimal, me trajnerin Franco Foda që ka fokusuar stërvitjet te tranzicionet dhe organizimi mes reparteve. Gjendja fizike e lojtarëve është optimale, duke i dhënë stafit teknik siguri për përballjen vendimtare.
Atmosfera në kampin kosovar është pozitive dhe e mbushur me besim. Të gjithë futbollistët janë të vetëdijshëm për rëndësinë e kësaj ndeshjeje në “Stozhice”, e cila mund t’i sigurojë Kosovës një vend në ‘play-off’ dhe të mbajë gjallë shanset për kualifikim direkt.
Pas stërvitjeve, mbrojtësit Mërgim Vojvoda dhe Dion Gallapeni shprehën optimizmin e tyre. Vojvoda theksoi se grupi është gati për ndeshje dhe synimi është fitorja, ndërsa Gallapeni shtoi se kundërshtari është i fortë, por Kosova do të luftojë për tri pikët.
Para nisjes për Lubjanë, kombëtarja do të zhvillojë një seancë të fundit stërvitore të lehtë, duke e përgatitur ekipin për këtë përballje që mund të përcaktojë fatin e Kosovës në këto kualifikime. /Gjurmuesi/
