Procesi i verifikimit të votave të ardhura nga jashtë vendit për rundin e dytë të zgjedhjeve lokale po vazhdon në Qendrën e Numërimit dhe Rezultateve. Qëllimi i këtij procesi është të konfirmohet nëse pakot me fletëvotime janë dërguar nga persona që figurojnë si votues të regjistruar për votim me postë.
Sipas zëdhënësit të KQZ-së, Valmir Elezi, deri në orën 10:00 të ditës së sotme janë vlerësuar mbi 9,800 pako të sjella tashmë në Kosovë. Nga to, më shumë se 7,240 janë aprovuar, ndërsa rreth 2,570 janë refuzuar.
Shkaku kryesor i refuzimit mbetet mungesa e dëftesës së regjistrimit, një dokument identifikues i domosdoshëm që çdo votues i regjistruar e merr nga KQZ-ja. Vetëm ky kriter ka çuar në refuzimin e afërsisht 2,500 pakove.
Më 11 dhe 12 nëntor, nga kutitë postare të KQZ-së në 22 shtete të ndryshme, janë tërhequr gjithsej 13,084 pako të supozuara me fletëvotime, të destinuara për votimin me postë në balotazh. Shumica e këtyre pakove tashmë ka mbërritur në Kosovë dhe po i nënshtrohet procedurave të vlerësimit. /Gjurmuesi/
