Sot në Kino Armata në Prishtinë, nga ora 17:00, do të zhvillohet një masterclass i veçantë mbi artin e rrëfimit dokumentar, ku i ftuar kryesor do të jetë regjisori i njohur Samir Karahoda.
Ky aktivitet organizohet si pjesë e projektit “RRËFIMTARIA”, një cikël ngjarjesh kulturore dhe edukative që synojnë të theksojnë rëndësinë e rrëfimit dokumentar në art, kulturë dhe shoqëri. Programi ka për qëllim të krijojë një mjedis inspirues për të rinjtë, studentët dhe krijuesit e rinj të filmit, duke u ofruar mundësinë të takohen me profesionistë dhe të shkëmbejnë përvoja rreth procesit krijues dhe rolit shoqëror të dokumentarit.
Samir Karahoda – regjisor, fotograf dhe kurator i filmave të shkurtër në DokuFest – do të udhëheqë ligjëratën. Filmat e tij të suksesshëm “Në Mes” dhe “Pa Vend” janë shfaqur në festivale të mëdha si Berlinale dhe Cannes, duke trajtuar tema të thella që lidhen me identitetin dhe realitetet shoqërore në Kosovë dhe më gjerë.
Gjatë masterclass-it, pjesëmarrësit do të njihen nga afër me procesin e krijimit të një filmi dokumentar, prej konceptit fillestar e deri te realizimi final, si dhe do të diskutojnë rolin e dokumentarit si mjet ndërgjegjësimi dhe aktivizmi. Pjesëmarrësit do të kenë mundësinë të shtrojnë pyetje, të ndajnë mendimet e tyre dhe të marrin këshilla nga profesionistët e fushës. /Gjurmuesi/
